Тэр Бумтан Ах

Түүхэнд хэрвээ гэж байдаггүй ч гэсэн энэ постыг би яг сайхан биччихмээр санагдлаа. 

Мөнгөний тухай сонирхдог бол уншаад үзэхэд гэмгүй л байх... Bitcoin бүх цаг үеийн дээд ханшаа тогтоож 99мянган долларт хүрч рекорд тогтоосон тул сонирхолтой байх болов уу хэмээн бичиж байгаа юм. 

2020 оны 4 дүгээр сарын сүүл болон 5 сарын эхэн үеийн үйл явдлын дурсамжийн баталгаа болгож screenshot харуулан та нартаа хуваалцаж байгаа юм. 

Биткойн $6000-ээс $9000-рүү бараг л сарын дотор хүрээд, dollar нь 2800₮ байсан үед би дансандаа хөөрхөн хэдэн төгрөг байлгаад ямар нэгэн байдлаар хөрөнгө оруулалт юмуу худалдан авалт хийх гэж бодож байсан юм. 

Лав 30 бүхэл биткойн авчихдаг юм билүү гэж ярьж байснаа санадаг юм. Тэгсэн бол өдийд 3 сая доллар буюу 10 орчим тэрбум төгрөгийн биткойн эзэмшиж байх байжээ. 

Харамсалтай мэдрэмжээ илэрхийлж байгааг бодоход би аваагүй өөр шийдвэр өөр худалдан авалтууд хийсэн байх нь... Алт $1200-аас $1900-руу бас гялс хүрч хүмүүс шаагилдаал би тэр үед 800гр орчим цутгуулж авсан байдаг юм. 

Юутай ч би мэдээ орсоноосоо хойш л мөнгө олох гэж хичээсэн ч хэд хэд хиншүү гартал шатаж үзсэн бөгөөд 2017оноос 2020 он хүртэл ер нь маш их хэмжээний мөнгөний өрийн дарамтанд амьдардаг байлаа, өдөрт хэдэн арван дуудлага мөнгөө нэхсэн хүмүүс. Тэдний буруу ч гэж юу байхав. Сүүлдээ би утсаа ч авах чадамжгүй болтлоо сэтгэлзүйн хүнд байдалд орж яг яахаа мэдэхгүй дэмий л хэдэн жилийг өөрийгөө буруутган утга учиргүй хямарч олон ч хүний аманд багтаж явсан нэг тийм хар бараан хугацаа байсан юм. 

Азаар гэх үү тэнэг зориг гаргаж гэх үү дахин бас нилээн том эрсдэл гаргаж хурган хөдөлснөөр яг энэ яригдаж байгаа 2020 оны 5-р сар гэхэд би үзээд өгье өр зээлгүй болж чадсан, бүр бүх зүйл гэрэлтэй санагдах нэг тийм үе бас тохиосон юм. Мөнгөгүй хүн чинь хөдлөхийн тулд олон өөрийн дотно хүмүүсээ дахин нэг удаа эрсдэл оруулан ёстой л нүд эрмэхийн зуур гэдэг шиг л маш ашигтай ажиллав. Тухайн үед нийт миний дансаар орж гарсан мөнгийг сүүлд харахад 5 тэрбум төгрөг байсан, бага мөнгө биш юм над шиг жижиг тоглогчийн хувьд. 

Дампуурч үзсэн хүмүүс яг ямар үйлдэл гаргадгийг мэдэхгүй, зарим нь амиа хорлолоо гэдэг юм хааяа дуулдаж л байдаг юм. Би бол өөрөөсөө асуулт асуусан юм тухайн үед. ЯАГААД БИ ИЙМ НӨХЦӨЛ БАЙДАЛД орчихов гэдэг асуулт, хариулт нь яахав ойлгомжтой. МӨНГӨний төлөө л амьдраад яваад хурдан баяжих гээд олон тэнэг үйлдлүүд хийгээд ингээд хасах хэдэн зуун сая болчихов, гэтэл тэнд дахиад нэг асуулт гарч ирсэн нь би ер нь тэр хөөцөлдөөд байгаа мөнгө гэдэг зүйлээ яг юу вэ гэдгийг хэр сайн мэддэг билээ гэдэг бодол төрөөд нухацтай бодтол би аймшигтайгаар МӨНГӨ ГЭЖ ЮУ ВЭ гэдгийг мэддэггүй болохоо ухаарсан юм. 

Чаддагаараа google дээр WHAT IS THE MONEY гээд асуулт тавиад бараг л 3 сар өөр юу ч хийлгүй судалсан даа, энэ судалсан гэдэг нь 2017 он юм. Өр зээлгүй болсон нь 2020 он шүү. 

Мөнгөний тухай тодорхой хэмжээний ойлголт болон өөрийн гэсэн дүгнэлттэй болсон хүн тэр дүгнэлтүүдээ хэрэгжүүлэх боломж нэг удаа гарч ирсэн ч ойр хавьдаа бараг л хамгийн тэнэг зүйл ярьдаг хүн болж, дэндүү утгагүй үйлдлүүд хийх гээд байгаа юм бишүү гэх мэтээр ирээ мохоолгох олон гайхалтай зөвлөгөөнүүдийг сонсоод өөрийнхөөрөө биш ч юм шиг мөн ч юм шиг хэд хэдэн хөдөлгөөн хийсэн, алдсан бас оносон. 

Алдагдсан боломж гэдэг зүйл бодит ч юм шиг бодит бус ч юм шиг сонин эд. Харамсалтайгаар өнөөдрийн энэ постыг бичиж байгаа би лав 10тэрбум төгрөгийн бэлэн мөнгөтэй амьтан бол биш нь үнэн юм. 

Сүүлийн үед хүмүүсийн мөнгөний мэдрэмж их сонин болсон санагддаг юм, ганц хоёр тэрбум гэдэг яриа миний чихэнд чамгүй их сонсогддог болсон. Гэтэл тэрбум гэдэг тоо өөрөө баримжаагаар хэр их мөнгө юм бэ гэдгийг бид нэг баримжаа авах гээд үзье. 10 сая төгрөгийн сарын цалинтай хүн өнөөдөр монголд бас гайгүй орлоготой хүндээ орно байх, тэрээр уг орлогоосоо нэг ч гутал хувцас авахгүй, юу ч идэж уухгүй, байр хоолны мөнгө зарцуулахгүйгээр 8 жил 4 сар үргэлжлүүлэн цуглуулж байж 1 тэрбум төгрөгний хуримтлал үүсгэх буюу бараг боломжгүй л зүйл л дээ. Хүний амьдралын нэг үе шүү дээ. Би тэгэхээр 10 тэрбум буюу 80 жил 10 саяын орлоготой амьдарч байж цуглуулах мөнгөн дүнг бий болгох боломжоо алдсан байна. Харамсахгүй байна, би үүнд бэлэн биш л байсан гэсэн үг. Одоо яаая гэхэв. 

За тэгэхээр өнгөрсөнрүү хэсэг бичлээ. Ирээдүй рүү бичье, бодъё... 

Би аавынхаа 37ных нь жил дээр гарсан ганц хүү нь юм, энэ жил миний 37ны жил. Би дэлхий дээр ирээд амьдарсан шигээ хугацааг дахин нэг туулахад одоогийн аавынхаа насан дээр ирэх нь гэсэн үг. Өнөө өглөө аавтайгаа хамт цайлахдаа баахан л ярилцлаа, намайг төрж байхад та ямар байсан бэ, дотроо юу бодогдож байсан бэ, манай гэр бүл хаана амьдарч байсан болон орлого, мөнгөний тухай ч мөн нилээн тухтай буу халав. 

Өчигдөр уржигдархан би нэг рийл үзсэн юм, 30 сая төгрөг 30 жил одоогийн хадгаламжийн хүүгээр хадгалвал хэдэн төгрөгтэй болох вэ гээд, хаан банкны хадгаламжийн тооцоолуураар бодоод үзэхэд 1.291.897.690₮ болох нь байна гэж харагдав, воо бас багагүй мөнгө байна байх 2054 онд гэсэн үг шүү дээ. 

Гэхдээ би чинь аавынхаа насан дээрх өөртөө буюу ирээдүйн Эрхэмбаяр луу цаг хугацааны машинаар мөнгө шидэх гэж байгаа хүн тул 36 жилээр бодож үзэв. 2.742.449.071₮ тэнгэрээс унаад ороод ирэхнээ өнөөдөр хадгалаад мартвал. Инфляци ямар байх, уг мөнгө маань тухайн үед юу авч хүрэх бол гэдэг бол ёстой 37 дахь асуудал. Тэр үед нэг тийм мөнгө гараад ирэх нь байна. Үр хүүхдүүддээ л үлдээх байх л даа. Миний хүү тухайн үед яг 42 хүрчихсэн НЯГТ үе дээрээ тууж явна байх. Алдаад оноод үзчихсэн, уйлаад баярлаад амьдралыг мэдэрчихсэн, бас хүүхдүүдийнхээ тухай бодоод л  явж байх болов уу. 

Дахиад нэг хадгаламжийн шийдэл хэрэгжүүлэх гэж байгаагаа бичье. Бас л ирээдүйн Ондоо ахын овог отгийнхонд зориулсан Money Bomb юм л даа. Өдөрт болгон өөрийн идэвхитэй ашигладаг данснаас 20к төгрөг өөрийнхөө өөр нэг хадгаламжийн данс руу автоматаар татуулдаг нэг тийм хувилбар бас байна. Ер нь санаа нь өөрийн өдрийн хэрэглээгээ харахад хүний өөрийн кофе бас бохь юмуу таксинд ийм мөнгө бараг л үр дүнгүй шахуу алга болж л байдаг юм. За тэгээд 20к хийж эхлүүлсэн данс руугаа өдөр бүр 20к татуулаад байхад сардаа 600к, за тэгээд бас 36 жилийн дараа цуглах мөнгө маань хэд юм бэ гээд харсан чинь 5ТЭРБУМ.

За тэгээд тэтгэвэр болон одоогийн хийж байгаа бизнес, хөрөнгө оруулалтуудаа бүгдийг нь тооцохгүйгээр нэг ийм тоонууд гарч байна.

ЮУТАЙ Ч БУМТАН ОНДОО АХ байх нь бол тодорхой, долларынх уу төгрөгийнх нь үү гэдэг л надад сонин байна.